6種常用健身補充劑介紹 – 乳清、肌酸、氮泵

乳清蛋白粉

乳清蛋白 (Whey Protein) 係一種取自牛奶嘅蛋白質，牛奶入面只有大約20%乳清成份，另外80%係需要幾個鐘先分解到嘅酪蛋白(Casein)，乳清蛋白具有高吸收率嘅優點，所以飲乳清蛋白粉比飲牛奶更快吸收，而且乳清蛋白有齊9種必須氨基酸(EAA)，EAA含量大約佔50%，比其他植身蛋白粉高，所以多數健身嘅人都係飲乳清蛋白，而乳清蛋白粉又分咗幾個種類，如果你未識分辨，所以睇呢篇《乳清蛋白分幾種?10條乳清蛋白常見問題》。

>延伸閱讀: 乳清蛋白粉牌子推薦香港(附購買連結)

增重粉

增重粉 (Weight Gainer) 顧名思義係用嚟增加身體重量，俗語有話要增肌必須先上磅，瘦底嘅人無論幾勤力練都可能只係練到鋼條型身材，稱唔上大隻，呢個時候可以食多啲碳水化合物食物，或者直接飲增重粉。成份方面以碳水化合物為主，配以蛋白質為輔 (多數都係用乳清蛋白)，如果想更了解增重粉，可以睇吓呢篇文《健身蛋白奶粉亂飲冇成效！分清蛋白粉、增重粉作用功效》。

肌酸

肌酸(Creatine)係天然嘅氨基酸之一，可以從肉類或魚類搵到，身體亦會自我合成。肌酸嘅用途係肌肉需要耐力及爆發力嘅時侯作為燃料，平時體內會儲存一定數量肌酸，留喺運動時使用。不過，身體自我合成肌酸嘅效率唔快，而透過食物攝取又需要食大量食物先得，差唔多1,000克肉類先有5克肌酸，但做一次重訓差唔多都消耗咗5克肌酸，單靠自身合成或食物攝取，好難維持身體內肌酸高水平儲存量，所以肌酸就成為健身人士必備補充劑之一。

邊度買健身補充劑?

>>>即刻去討論區同占有傾吓啦<<<

EAA

EAA係必須氨基酸 (Essential Amino Acids) 嘅簡寫，即係上面所講人體必須嘅9種氨基酸，每種氨基酸對身體有各自嘅作用，只要攝取足夠EAA，既可防止卡路里攝取不足造成肌肉流失，亦可以喺卡路里盈餘時刺激肌肉生長。

相對比乳清蛋白，直接飲EAA補充劑所獲得嘅EAA會較充足之外，EAA會被身體直接使用，而乳清蛋白需經過消化分解先被轉化成各種氨基酸。

BCAA

喺9種必須氨基酸入面，其中3種擁有特別嘅支鏈結構，分別係亮胺酸、異亮胺酸、纈胺酸，呢3種氨基酸就係BCAA。不過只食BCAA補充劑對增肌有冇實際幫助，喺科學研究上一直存在爭議，認為有用嘅一方強調高比例BCAA係刺激肌肉生長嘅因素之一；否定一方則認為BCAA缺乏其餘6種必須氨基酸，身體無法用嚟製造蛋白質，從其他食物或補充劑中攝取所有9種必須氨基酸甚至更好。