6大香港健身室比較及介紹2023

近年香港越開越多健身室，開到成行成市，好似便利店咁「總有一間喺左近」。不過咁多間健身室反而令人唔知揀邊間好，所以我哋就搵咗香港幾間大型健身室比較一下，睇吓幾間健身室比較起嚟有咩分別，方便大家做決定。

揀健身室注意要點

喺開始睇健身室比較之前，可留意揀健身室有咩要注意：

1. 健身室價錢：價錢對某啲人嚟講可能唔太重要，不過最好就一分錢一分貨甚至兩分貨嘅健身室啦。
2. 健身室收費模式：健身室係按次收費、按月收費抑或按年收費呢？
3. 健身室分店數量：分店數量越多代表越方便就腳，唔只要近屋企，亦可留意自己公司或常去嘅地區有冇分店。
4. 健身器械種類：健身器械種類是否齊全絕對會影響你嘅健身成效同進度，揀一間有齊各種類器械嘅健身室非常重要，而且啲機越新款越好。
5. 使用健身室資格：留意有冇設特定要求先可使用健身室，或者是否需要購買會籍等。
6. 是否需要簽約：留意購買健身室會籍係咪需要簽約，而合約年期亦需留意。
7. 健身室開放時間：現時好多健身室都有24小時開放，不過有啲都仲係指定開放時間，留意健身室開放時間係咪就到自己嘅空餘時間。

香港健身室介紹

以下各健身室按首字母排名，所有資料取自該品牌官網（截至01/2023）。

24/7 Fitness健身室

24/7 Fitness係24小時開放健身室，賣點係「三無」：無需預繳、無入會費、無隱藏收費，會籍收費都明碼實價清楚列晒喺佢哋個官網，包保唔會比人呃。同樣地24/7 Fitness都係特許經營制度，每間分店都有唔同老闆，官網有清楚列明各分店嘅聯絡資料。

24/7 Fitness月費價錢及會籍

24/7 Fitness收費按你購買月籍嘅時間而定，最平可低至HK$498/月，分別係：

• 1月個健身會籍：HK$998/月
• 6月個健身會籍：HK$698/月
• 12月個健身會籍：HK$498/月

除咗1個月健身會籍無需簽約之外，其餘兩個會籍計劃都需要簽約，不過所有會籍計劃依然係每個月交一次錢，唔使一次過畀晒。

24/7 Fitness設有免費1天健身試玩，只需要喺佢哋個官網登記簡單資料即可。

24/7 Fitness分店

目前為止24/7 Fitness係全港最多分店私人健身室，共有75間分店(計及正在裝修即將開幕分店)，想知24/7 Fitness 分店位置可以撳入條link去官網睇睇。

Anytime Fitness健身室

Anytime Fitness係一個國際品牌，全球各地都見到佢哋嘅蹤影，賣點係24小時開放健身室，會員買咗會籍30日之後，可使用其他國家Anytime Fitness分店，但因為全部分店都係特許經營，售後服務未必一樣質素，官網有清楚列明各分店嘅聯絡資料，有事想問都算方便。

Anytime Fitness月費價錢及會籍

Anytime Fitness嘅月費並無喺官網中列明，以我哋所知係實行簽合約+月費制，即簽訂某使用年期並按月交錢，現時月費最平應大約HK$5xx，確實收費需要自己問問各分店。

大部份分店有提供1天免費試用，詳情可以撳入條link去官網，輸入地區並揀選分店後，填寫簡單個人資料即可。

Anytime Fitness分店

Anytime Fitness目前有27間分店，集中喺新界及九龍，而港島只有6間分店，撳入呢度搵詳細分店地址。

Fit 24健身室

Fit 24同樣係24小時開放健身室，分店數量相對較少，感覺上少啲人留意呢個品牌，但其實都係性價比高嘅健身室，賣點係無需預繳、全自助化、價錢平，價錢明碼實價清楚列明喺Fit 24官網。

Fit 24月費價錢及會籍

Fit 24嘅會籍計劃相對簡單，採用合約制+按月收費，只有1個月及12個月計劃，月費分別係HK$598及HK$349，係24小時自助任用健身室中最平選擇。

Fit 24有提供1日免費試用，去官網輸入簡單個人資料及揀選分店即可。

Fit 24分店

Fit 24分店相對上較少，目前只有11間分店，分別喺粉嶺、元朗、將軍澳、葵芳、藍田、新蒲崗、尖沙咀、北角、灣仔等。

Physical舒適堡健身室

Physical係香港早期大型健身室之一，嚟搵城城做代言應該全香港人都識，賣點係平！平均月費只係一百幾十蚊，仲平過康文署健身室。不過平係有代價嘅，唔少人反映Physical經常sell課程同會籍，同埋唔係24小時開放。

Physical月費價錢及會籍

以連鎖私人健身室嚟講，Physical價錢應係算係最平之一，佢哋嘅收費模式係預繳形式，網站廣告顯示平均月費只需HK$125，就可以使用佢哋全線分店(美孚分店除外)，以我哋所知以上優惠係HK$1,000/8個月。

不過我哋都留意到Physical有銷售員負責做推廣，就好似電訊上台服務咁，不同銷售員提供嘅優惠及服務內容都略有分別，所以入會前不妨去多幾間分店先格價。

Physical設有免費7天健身試玩，詳情可以去門市問吓。

Physical分店

Physical目前喺香港共有下列19間分店。

Pure Fitness健身室

Pure Fitness係一間主攻高端市場嘅健身室，收費對比其他牌子會貴啲，但場內健身設施都比較新款同全面，除此之外佢哋嘅瑜伽堂都好出名，唔少女士會去參加，留意佢哋唔係24小時開放。

Pure Fitness月費價錢及會籍

Pure Fitness嘅收費模式係預繳式，分1個月、6個月及12個月等任用計劃，不過佢哋嘅月費比較特別，每間分店都有唔同收費，月費相差可達接近HK$700，由於太多唔同價錢非常亂，呢度就唔講咁多，詳情可以留意Pure Fitness官網。

Pure Fitness現時有3日周末免費試玩健身室優惠，可按連結去佢哋個官網揀選並預約心水分店。

Pure Fitness分店

只計健身室唔計瑜伽，Pure Fitness目前共有12間分店，主要集中喺港島區，共佔9間，而中環更有多達4間分店，其他地區包括淺水灣、銅鑼灣、鰂魚涌、灣仔、牛頭角、尖沙咀、旺角。

康文署健身室

講得香港大型健身室點少得康文署，因為康文署總共有81間健身室分布全港各區，賣點係場館多同月費平，更可以按鐘計，認真抵玩。優點係分店多收費平，缺點係部份場館器材較殘舊，器材種類唔全面，只適合入門至中階健身玩家，而且部份場館間中會暫停開放使用，畀康文署健身班或團體租用，唔多唔少都會影響訓練行程。

康文署健身室入場費用

康文署嘅入場費用係根據你嘅使用資格而定，一般成人收正價，附合資格嘅學生、長者、傷健人士及其陪同者，可享優惠價。價錢方面，分時票及月票。

• 時票：正價每小時HK$13(非繁忙時間)及HK$14(繁忙時間，優惠價統一HK$7；
• 月票：正價每月HK$180、優惠價HK$90。

不過要留意，一般人唔係想做時去買飛就做得，而要事先獲得康文署健身室使用資格，最簡單就係報佢哋啲訓練班上幾堂。

如果想了解更多康文署健身室資料，可以睇吓另一篇文章：康文署健身室申請流程攻略

 

>>撳入呢度即去健身室討論區同占友傾吓啦<<<

各健身室比較列表